অসমত উৎপাদিত জাপানী মাটচা চাহে (MATCHA TEA)বিশ্ব বজাৰত নতুন সম্ভাৱনা দুৱাৰ মুকলি কৰিলে।

তিনিচুকীয়া, নিজা প্ৰতিবেদকঃ জাপানৰ বিশ্ববিখ্যাত সেউজীয়া চাহ মাটচা (Matcha Tea) এতিয়া অসমতো সফলভাৱে উৎপাদন আৰম্ভ হৈছে। তিনিচুকীয়া জিলাৰ সৰু টিংৰাই চাহ বাগিচাত উৎপাদিত এই বিশেষ চাহে ৰাজ্যৰ চাহ উদ্যোগলৈ এক নতুন দিশ উন্মোচন কৰিছে। বৰ্তমান এই চাহৰ বজাৰ মূল্য প্ৰতি কিলোগ্ৰামত প্ৰায় ₹৩,০০০, যিয়ে উচ্চমূল্য সংযোজিত (Value-added) চাহ উৎপাদনৰ ক্ষেত্ৰত অসমৰ বাবে এক আশাব্যঞ্জক সম্ভাৱনা সৃষ্টি কৰিছে।

মাটচা হৈছে বিশেষ পদ্ধতিত উৎপাদিত এক প্ৰকাৰৰ গুড়ি চাহ। চাহপাত সংগ্ৰহৰ কেইসপ্তাহমান পূৰ্বে গছসমূহ আংশিক ছাঁত ৰখা হয়, ফলত পাতত ক্লোৰ'ফিল, এল-থিয়ানিন আৰু কেটেচিনৰ পৰিমাণ বৃদ্ধি পায়। শুকুৱাই সূক্ষ্ম গুড়ি কৰি তৈয়াৰ কৰা এই চাহ পানীৰ সৈতে সম্পূৰ্ণৰূপে সেৱন কৰা হয়, সেয়েহে ইয়াৰ পুষ্টিগুণ সাধাৰণ সেউজীয়া চাহতকৈ অধিক বুলি গণ্য কৰা হয়।

স্বাস্থ্য বিশেষজ্ঞসকলৰ মতে, "মাটচা চাহত" প্ৰচুৰ পৰিমাণে এণ্টিঅক্সিডেণ্ট থাকে, যিয়ে শৰীৰৰ কোষসমূহ সুৰক্ষিত ৰখাত সহায় কৰে। ই ৰোগ-প্ৰতিৰোধ ক্ষমতা বৃদ্ধিৰ লগতে হৃদযন্ত্ৰৰ স্বাস্থ্য উন্নত কৰা, শৰীৰৰ বিপাক ক্ৰিয়া সক্ৰিয় কৰা, মনোযোগ আৰু মানসিক সতেজতা বৃদ্ধি কৰা আদি ক্ষেত্ৰতো উপকাৰী বুলি ধৰা হয়। ইয়াৰ উপৰিও এই চাহ বিশ্বজুৰি স্বাস্থ্যসচেতন লোকসকলৰ মাজত দ্ৰুত জনপ্ৰিয়তা লাভ কৰিছে।

বিশেষজ্ঞসকলৰ মতে, অসমৰ জলবায়ু আৰু উৰ্বৰ মাটি মাটচা উৎপাদনৰ বাবে উপযোগী হ'ব পাৰে। সৰু টিংৰাই চাহ বাগিচাৰ এই সফল পদক্ষেপে ৰাজ্যখনত উচ্চমূল্যৰ বিশেষ চাহ উৎপাদন, ৰপ্তানি বৃদ্ধি, কৃষক আৰু চাহ উদ্যোগৰ আয় বৃদ্ধিৰ লগতে অসমক বিশ্বৰ প্ৰিমিয়াম চাহ বজাৰত নতুন পৰিচয় দিয়াৰ সম্ভাৱনা উজ্জ্বল কৰিছে।

চাহ উদ্যোগৰ লগত জড়িত মহলৰ আশা, গুণগত মান অটুট ৰাখি আন্তঃৰাষ্ট্ৰীয় মানদণ্ড অনুসৰি উৎপাদন অব্যাহত থাকিলে অসমত উৎপাদিত মাটচা চাহ অদূৰ ভবিষ্যতে বিশ্ব বজাৰত এক স্বীকৃত আৰু সমাদৃত ব্ৰেণ্ড হিচাপে প্ৰতিষ্ঠা লাভ কৰিব।